Үздік нәтиже

Кикбоксингтен Ташкент қаласында өткен әлем кубогында Алматы облысының спортшылары олжалы оралды. Өңірден барған 23 кикбоксшының 19-ы жүлдегер атанып, 8 алтын, 6 күміс және 5 қола медаль жеңіп алды. Байрақты бәсекеде ерекше шеберлігімен көзге түскен спортшылардың бірі – Камила Шанышбаева. 17 жастағы бойжеткеннің кикбоксингпен айналысып жүргеніне небәрі төрт ай болған. Соған қарамастан, табандылығы мен қажырлы еңбегінің арқасында әлем кубогының алтын медалін иеленді. КАМИЛА ШАНЫШБАЕВА КИКБОКСИНГТЕН ӘЛЕМ КУБОГЫНЫҢ АЛТЫН ЖҮЛДЕГЕРІ«Тәртіп сақтап, алдыма мақсат қойдым, барынша жаттықтым. Міне, сол мақсатыма жеттім. Жеңісімді ең алдымен анама арнаймын. Ол мені үнемі қолдап отырады. Әрқашан: “Бәрі жақсы болады, жарысқа барасың, жеңіске жетесің”, – деп жігерлендірді. Жаттықтырушыларыма да алғыс айтамын. Олар да маған үлкен қолдау көрсетті.» Әлемнің 76 елінен келген 2600-ден астам спортшы Өзбекстанда өткен кикбоксингтен әлем кубогында бақ сынады. Бәсекелестік жоғары болғанына қарамастан, Алматы облысының жас спортшылары қарсыластарынан қалыс қалмай, жоғары нәтиже көрсетті. АСХАТ АХМЕТЖАНОВАЛМАТЫ ОБЛЫСЫНЫҢ КИКБОКСИНГТЕН АҒА ЖАТТЫҚТЫРУШЫСЫ«Бәсекелестік өте жоғары болды. Соған қарамастан, біздің спортшылар керемет нәтиже көрсетті. Қатысушылардың барлығы үздік көрсеткішпен оралды. Менің ойымша, бұл ең алдымен қазақстандық спортшылардың рухының арқасы. Олар Отан үшін, ту үшін, қала мен облыс үшін күресті және биік белесті бағындыра алды.»   Жалпыкомандалық есепте Қазақстан құрамасы 48 алтын, 43 күміс және 59 қола медаль жеңіп алып, екінші орынға тұрақтады. Бірінші орынды Өзбекстан құрамасы иеленсе, үздік үштікті Тәжікстан спортшылары түйіндеді.