Қараңғы режим:
ЮНЕСКО-ның Париждегі штаб-пәтерінде халықаралық жастар фестивалінің көрмесі мен гала-концерті өтті. Шара «ЮНЕСКО-ның материалдық емес мәдени мұрасын сақтау мен ілгерілетудегі әйелдер рөлі» тақырыбында ұйымдастырылды. Фестиваль аясында өткен “Қылқалам шеберлері” байқауына әлемнің 54 елінен мыңнан астам жас таланттар қатысқан. Соның 400-і іріктеуден өтіп, ақтық сынға шықты. Айта кетейік, бейнелеу өнері және музыкалық циклдер бір алаңда – ЮНЕСКО штаб-пәтерінде бірінші рет тоғысып отыр. Оған әлеуметтік жағдайы, шыққан жері мен тегіне қарамастан кез келген дарынды жас қатысып, әлемнің маңдайалды мамандарымен бірлесе жұмыс істеуге мүмкіндік алды. «Біздің басты міндетіміз – өз мәдениетімен қатар өзгелердің құндылығын құрметтейтін ұрпақ тәрбиелеу» деген тілегін айтты Дүниежүзілік және Қазақстандық ЮНЕСКО клубтары мен қауымдастықтары федерацияларының президенті Болат Ақшолақов. «Жанды мұра: әйел рөлі» атты осы ауқымды шығармашылық көрме 16 қарашаға дейін келушілер назарына ұсынылады.
