Қараңғы режим:
Бас прокуратураның Қоғамдық мүдделерді қорғау қызметі мен Алатау қаласын дамытуға жауапты басқарушы мекеме арасында өзара түсіністік пен ынтымақтастық туралы меморандумға қол қойылды. Alatau City халықаралық және отандық инвесторлар үшін жаңа тартымды орталыққа айналды. Меморандум инвесторларға жұмыс тәртібін нақты түсіндіреді. Сондай-ақ инвестициялық жобаларды іске асыруға қатысты ақпарат береді. Кәсіпкерлер құқығын қорғау және заң аясында қолдау көрсету бағыттары да айқындалады. Бүгінде шахарда жергілікті және халықаралық бастамаларды қоса алғанда, 70 ке жуық жоба бар. Оларға тартылатын инвестицияның жалпы көлемі 6 миллиард доллардан асады.
Шыңғыс Әрінов Алматы облысының әкімі болып тағайындалды. Оның кандидатурасы облыстық мәслихат депутаттарының дауыс беруі арқылы қолдау тапты. Мемлекет басшысы бұл қызметке екі үміткерді ұсынған болатын. Олардың қатарында бұрынғы Төтенше жағдайлар министрі Шыңғыс Әрінов пен Алматы облысы әкімінің орынбасары Ғани Майлыбаев болды. Кандидаттарды қарау үшін арнайы отырыс өткізіліп, оған 178 мәслихат депутаты қатысты. Дауыс беру қорытындысы бойынша Шыңғыс Әріновті депутаттардың 83 пайызы қолдады.
