BAKAD компаниясы жүргізушілерден артық құжат талап еткені анықталды

Жеңілдікпен берілетін абонементтерге байланысты азаматтардан заңсыз құжаттар сұратылғаны белгілі болды. Бұл туралы Бәсекелестікті қорғау және дамыту агенттігінің ресми сайтында жарияланды.

Агенттікке келіп түскен арыздарға сәйкес, BAKAD компаниясы азаматтардан жеңілдікпен абонемент алу үшін қосымша құжаттар талап еткен. Атап айтқанда, І және ІІ топтағы мүгедектігі бар тұлғалардан «Мүгедектердің жеке көмекшісімен келісімшарт», ал көпбалалы аналардан – 4 және одан көп баланың туу туралы куәліктерінің көшірмесі сұралған. Бұл талаптар заңда көрсетілмеген.

Тексеру нәтижесінде аталған құжаттарды сұрату арқылы компания азаматтардың құқықтарын бұзып, әкімшілік кедергілер жасағаны анықталды.

Осыған байланысты BAKAD компаниясына заңға сәйкес шаралар қабылданып, артық талаптар жойылды. Агенттік бұл әрекеттердің Әкімшілік құқық бұзушылық туралы кодекстің 170-бабына сәйкес келетінін атап өтті.

Жүргізушілерге енді абонемент рәсімдеу кезінде тек қажетті құжаттарды ұсыну жеткілікті. Бұл өзгеріс азаматтарға жеңілдік алу процесін жеңілдетіп, уақытты үнемдеуге мүмкіндік береді.

Дереккөз:AutoReport.kz