«Хабардан» басталған жол: Қос Қымбаттың Qonaev Media-ға дейінгі тарихы

«Хабар» телеарнасына биыл 30 жыл. Осы уақыт ішінде ол елдің басты мемлекеттік арнасына айналып, көрерменге сан түрлі жаңалықтар мен есте қаларлық жобаларды ұсынды. Алайда арнаның тарихымен бірге халық жадында қалған тұлғаларды айтпай кету мүмкін емес. Солардың ішінде Қымбат Хангельдина мен Қымбат Досжанның орны ерекше.

Қымбат Хангельдина өзінің еңбек жолын «Хабардың» кешкі жаңалықтарынан бастап, жүздеген тікелей эфирге қатысып, таңғы және жексенбілік бағдарламаларды жүргізді. Өзі айтқандай, ол телеарнаға әдейілеп келмеген, кастингке шақырылғанда даусы мен бейнесі көпшіліктің көңілінен шыққан соң эфирге шықты. Содан бері экраннан түспей, дикторлық мектептің дамуына елеулі үлес қосып келеді. Қазір Қымбат Хангельдина Qonaev Media телеарнасының бас директоры қызметін атқарып, мамандығына адалдығын сақтап, жас буынға үлгі болып отыр.

Қымбат Досжан алғаш рет 1997 жылы «Сәлем, Қазақстан» бағдарламасы арқылы «Хабар» эфиріне шықты. Кейін жаңалықтар мен мәдени жобаларды жүргізіп, «Бармысың, бауырым» бағдарламасы арқылы қазақ телевизиясының тарихына ерекше із қалдырды. Оның дауысы мен эфир жүргізу мәнері тұтас бір буынға үлгі болды. Бүгінде Қымбат Досжан Qonaev Media телеарнасының бас продюсері ретінде мол тәжірибесін жаңа заманның талаптарымен ұштастырып, жас журналистер мен дикторларға жол көрсетіп келеді.

Қос Қымбаттың есімі «Хабардың» тарихына алтын әріппен жазылды. Олар қалдырған мұра мен тәжірибе қазақстандық телеарналар үшін баға жетпес қазына. Қазірдің өзінде олар дәстүр мен жаңашылдықты үйлестіріп, қазақ телевизиясының жаңа кезеңін қалыптастыруға атсалысып келеді.