Қазақстанда Мемлекеттік рәміздер күні аталып өтуде

Бүгін, 4 маусым ― Қазақстан Республикасының Мемлекеттік рәміздер күні. Бұл күн еліміздің Туы, Елтаңбасы мен Әнұранына арналған ерекше мереке ретінде белгіленген.

Аталған күн 2007 жылы Қазақстан Республикасы Президентінің Жарлығымен ресми түрде бекітілген. Бұл ― мемлекеттік рәміздерге деген құрмет пен патриоттық сана-сезімді арттыруға бағытталған маңызды күн. Айта кетейік, 1992 жылдың дәл осы күні тәуелсіз еліміздің Мемлекеттік Туы мен Елтаңбасы бекітілсе, қазіргі Мемлекеттік Әнұран 2006 жылы қабылданған болатын.

Елдіктің белгісі ― рәміздер

Мемлекеттік рәміздер ― ел тәуелсіздігінің, тұтастығы мен ұлттық болмысының көрінісі. Олар ― әрбір азаматтың жүрегіне жақын қасиетті нышандар.

Қазақстан Республикасының Мемлекеттік Туы ― суретші Шәкен Ниязбековтің авторлығымен жасалған. Көк түсті ту ― бейбітшілік пен тұрақтылықты, ашық аспан мен ел бірлігін білдіреді. Туда бейнеленген күн мен қыран ― еркіндік пен өрлеудің, жарқын болашаққа ұмтылыстың символы. Ал ұлттық өрнек ― халқымыздың мәдени құндылықтарын паш етеді.

Мемлекеттік Елтаңба ― сәулетшілер Жандарбек Мәлібеков пен Шот-Аман Уәлихановтың туындысы. Елтаңбаның өзегінде ― шаңырақ бейнесі. Бұл ― ортақ үйдің, ұлттық бірліктің белгісі. Тұлпарлар ― күш-қайрат пен еркіндікті, болашаққа деген сенімді білдіреді.

Мемлекеттік Әнұран 2006 жылы қабылданды. Әнін жазған ― Шәмші Қалдаяқов, ал сөзін жазғандар ― Жұмекен Нәжімеденов пен Қазақстанның Тұңғыш Президенті Нұрсұлтан Назарбаев. Әнұран ― елдің рухын, мақсаты мен мұратын айшықтайтын патриоттық туынды.

Мемлекеттік рәміздер ― халқымыздың тарихи жолын, мәдениетін және құндылықтарын бейнелейді. Олар ― ұлттың рухани тұтастығы мен болашаққа деген сенімінің негізі. Рәміздерге құрмет көрсету ― әр азаматтың парызы әрі елге деген сүйіспеншілігінің көрінісі.