Тоқаев жемқорлықпен күресте ешкімге жеңілдік болмайтынын ескертті

Президент бүгін Қауіпсіздік Кеңесінің шұғыл отырысында «Самұрық-Қазына» қоры мен «Қазақстан темір жолы» компаниясы басшыларының ұсталуына байланысты мәлімдеме жасады. Бұл - мемлекеттік компанияларда жемқорлықтың белең алғанын көрсететін аса күрделі жағдай, - деді Қасым-Жомарт Тоқаев.

Соңғы үш жылда елімізде сыбайлас жемқорлыққа қатысты 3 168 қылмыс тіркелген. Соның 2 165-ін мемлекеттік қызметшілер жасаған. Заңсыз алыс-берістің жалпы сомасы - 248 миллиард теңге. Бұл - алаңдатарлық статистика. Мемлекет басшысы жемқорлықпен күресте ешкімге артықшылық берілмейтінін қатаң ескертті. Анықталған заңбұзушылықтардың барлығы ашық тексеріліп, халыққа жарияланып отырады. «Өзіміздікі» және «өзіміздікі емес», тіпті «бөтен» деп бөлуге мүлде жол берілмейді. Конституцияда заң мен сот алдында бәрі тең екені анық жазылған. Біз бәріміз де осы заңға бағынуымыз керек, — деді Президент.

Ал Үкімет жемқорлықты азайтуға және квазимемлекеттік сектордағы жұмыс сапасын жақсартуға қатысты жоспарын он күн ішінде дайындауы тиіс. Еске салайық, күні кеше Ұлттық қауіпсіздік комитеті «Самұрық-Қазына» қорының төрағасы Нұрлан Жақыпов пен «Қазақстан темір жолы» компаниясының басшысы Елжас Отыншиевті жемқорлыққа қатысы бар деген күдікпен ұстаған болатын.